حبة حوار

1. حلمت النهارده بكابوس فظيع صحيت منه وأنا بصرخ و دموعي مغرقه المخده.. "ياحرام".. و طبعا ماعرفتش أنام تاني بعدها لحد معاد الشغل و قمت البس.الجميل بقي اني وانا نازل الشغل قعدت افتكر فيه مش فاكر أي حاجه..أعرف سبب صريخي حتي.. مافيش ..حاجه غبيه صح.
2. كنتي جميله قوي.. بجد استمتعت بالوقت القليل اللي قضيته معاكي. كان نفسي يطول طبعا بس تتعوض. فرحت لما شفتك بتضحكي كنت مش حاسس بوجع رجلي معاكي واقف ولا كأن فيه حاجه. مجرد ماقلنا لبعض سلام و كل واحد راح في اتجاهه. ألم رهيب لقيته في رجلي.روحت مش قادر و لقيت شعيرات صغيره نزفت و رجلي ورمت.يالهويي... كان يوم. بس مش هنسي فيه حلاوته معاكي والضحكه الجميله..بس بس. بس.
3. وصلت لنقطه حيوية في نفوخي اللي هي: " الواحد من غير حب زي الفرخه من غير ريش، زي البطيخه من غير بزر، زي القميص من غير زراير، زي البنت من غير شعر.. يعني حاجه وحشه و خلاص "
4. البلد في الحر بيبقي دمها يلطش.. بس فيه حاجات بتخلي الواحد يستظرفها شويه......؟!!
5. تقولي بتحس براحه في يومك؟ أقولك طبعا ..وأنا في الحمام...
6. واحد من حبايبنا..بيقولي:انت بتجيب الكلام الحلو ده ازاي بجد والله انا بقف عند كلامك بعد ماقراه كذا مره مابعرفشي اكتب أقول ايه عليه.
7. فكرت مع نفسي شويه لقيتني كمان بقف قدام كلامي كتير ماعرفشي اقول ايه.كفايه انه طلع مني و كويس انه بيعجب الناس.وحلو اني لسه بقدر افكر اتخيل وأكتب.

بسرح

ليه لما بسرح في عنيكي مابتوقفنيش؟..سايباني أعوم و أغرق..أموت و أعيش

أفوق علي ضحكة منك يضحك معاها قلبي.و همومي تروح ماتجيش.. و عجبي.

شباكي

قفلت شباكي عليا شويه.. مش عايز ساقعه ولا حر..

عايز الدنيا أحلي من غير ماشم روايح شر..

من غير تراب المدينه من غير غبار الأموات العايشين حواليا ..مش عايز داوشه تاني مش عايز صريخ. مش عايز واحده تقرفني بعمها اللي مايتسمي.. عم غباء.. مش عايزخناق شبعت خناق.

مش عايز ناس تلومني علي حاجات عملتها و حاجات معملتهاش.. شبعت من التلوث شبعت نكد.. شبعت من الشوارع و الشبوره اللي ملت هوانا من جوه و من بره ..هقفل شباكي و أدور علي منور..علي حمام علي صاله يكون شباكها بيطل علي حاجه غير.. علي شارع غير.. علي بشر غير و هوا غير.. و افتحه علي الآآآآخر..

هل تتذكرنا المرايا حين نغيبُ عنها

هشوف النور

اتعذبت كتير.. اتجرحت أكتر. بنسي. بعيش بحب واتحب.ببعد و بقرب. بشوف الشمس من جوه ومن بره. نورهاجديد. بس مش دافيان علي طول .عشان فيه ليل و برد و قمر بيونسني . بيخليني اعيش و ارتاح و احلم بيه. بنوره جالي و استنيته كتير. احتواني و بلتفت ألاقيه. هيخطفني يشلني من همي ويخلصني من قيودي و من أحزاني.. هروحله بكل قوه.. هشوف النور من جديد من هنا وهناك.

مذاق جديد

صار للحياة مذاق جديد.. صار للطعام طعم. والشراب متعة. ولجسدي قوة من حديد.. أصبحتِ قطعة سكر فنجاني.إن كنت عاديا أو أجرب طقس من نظام تخسيس متعب جديد. أصبحت حلوة أيامي.. أصبحت لون طيف فريد.. جعلتني تلك الحلوة أغيَر اسلوب حياتي ، استعيد عافيتي من جديد.. أعتذر عن كوني عنيد.. عن أسلوبي في التفاهم من بعيد. فبعدما ذقت فنجاني علمت أنك ملاكي الوحيد.

شاطي البحر

علي شاطئ بحر المتوسط.. في ليلة صافيه هادئة.. تمددت بجسدي علي الرمال الناعمة و نسيم البحر الهادئ يداعبني..خلعت حذائي بجانبي.. و سرحت في نجوم سماء ليلي الهادئ.. أغلقت عيني للحظات مع شهيق عميق يطهر رواسب يومي المزدحم داخل صدري..

إعتدلت من نومي لأعود الي يومي الممل لأجد...................... حذائي قد سرق.

الزحام

وسط الزحام فيه ركام للناس والمشاعر و الكلام.

فيه خنقه فيه خناقه فيه عطس وفيه زكام.

فيه محبين و ايدين ماسكه الإدين..

فيه بنت وولد ماشيين، وشهم فرحان مبسوط و عنيهم بتقول حب و غرام..

في وسط الزحام كتير كلام.

حب ايه

حب ايه و بتاع ايه؟ انتم شاطرين غير في كده.مافيش في دماغكوا حاجه غير الحب والبنات والولاد و قلة الأدب دي. خلاص مافيش حاجه تشغل تفكركوا وكلامكوا. الحياة خلصت من الحاجات المهمه الكبيرة صفصفت علي الحب. شباب آخر زمن..

طيب مالحب يا عمو في كل حاجه في حياتنا فعلا حتي لو اقتصرناه علي حب بنت أو ولد زي مابتقول.و بعدين عايزنا نفكر و نتكلم في ايه يشغل بالنا و مستقبلنا غير الحب عندك حاجه؟

يا سلام.. مافيش وطن عايزين تخلوه يقوم علي رجليه و تخلوه أحسن ، مافيش دين نفسك يرجع قوي زي الأول قضايا العيشه و اللي بيعشوها.

طيب ماهو كل ده يا عمو هيتعمل ازاي من غير الحب. لو مش بتحب دينك و بتغير عليه مش هتقدر تخليه يرجه قوي..و لو مش بتحب بلدك و بتخاف عليها مش هتعرف تغير حاجه فيها حتي لو السواد كان مالي الدنيا حواليك.حتي لو فقدت الأمل في التغير هتلاقي حلول حتي لو مع نفسكو القريبين منك.. لو مش هتحب شغلك و تخاف عليه مش هتقدر تثبت نفسك فيهو تقوم بالمطلوب منك و لو بتحب واحده و ربنا كتبهالك زوجه عايشين بتحبوا بعض هتذلل أي حاجه ممكن تفق في طريق حياتكم و تحب ولادك عشان تربيهم كويس و يحققوا اللي مش عارف تحققه في بلدك أو دينك.. هتلاقي الحب في كل حاجه حواليك.. واللا ايه يا عمو؟!!

لسه بتلعبي

هو انت لسه بتلعبي.. و اللا خلاص بقي عادي انك تمسكي لعبتك و الوقت يمر بيكي و انت مش حاسه ..

الدنيا تروح و تيجي و انت محبوسه في عقلك في مكانك في سريرك في حطانك في عرايسك

و ..عريسك.!!

في فستانك و مرايتك.. مبسوطه كده؟ خليكي كده..

أي كلمة منك أو منه

استنيت أي كلمة منك أو منه.. أي كلمه تحسسني إن ليا خاطر إن الحاجات اللي عملتها ليها قيمة. إن العملته ليكي وليه متقدر. كنت فاكر ان أخلاق الرجال لسه موجوده.. إن ظني بيه كان في محله. إن طيبتي طيبة مش سذاجه.إن الصدق والحب والصداقه مطلق مالوش حدود وألوان. خلتوني أندم علي شيء جميل.. آسف.

في المترو

يااااه.. أوووف..ايه ده؟ ماتوسع شوية مافيش دم؟..

مانتي ليكي عربيتين مابتروحيش تركبي فيهم ليه بدل مانت مزنوقه وسط الرجاله كده..

وهما يعني كتبوا علي العربيات الباقيه للرجال فقط..؟

لأ..

خلاص انت ايه اللي مزعلك؟

صحيح أنا ايه اللي مزعلي.. ياعيني علينا يارجاله..

سؤال.. حوار.. بتاع..(3)

نظرلي نظره بقرف وقالي:- عايز ايه؟ غير لقمه نظيفه، و هدمه كويسه، و عربيه بتمشي و فيها كاسيت ، وكمبيوتر فيه انترنت ، و صلة دش ، وأصحاب تخرج معاهم و تقضي وقت مش بطال..دانت تبقي طماع قوي.

قلتله: و هو ده كله و مابقاش طماع؟! يمكن..

بس ناقصني أحب واتحب.. والا الإنسان مابيملاش عينه غير التراب زي مابيقولوا..

قالي: و تفتكر لما تحب هيحبك زي مابتحبه..أو تتحب و تحبه زي مابيحبك.؟ هتلاقي حاجه ناقصاك.

هو لازم ملاقيش اللي نفسي فيه .. لازم تطلع حاجه ناقصه .. ماينفعشي الأثنين معا.. في لكشه واحده.؟!

سؤال..حوار..بتاع..(2)

ليه تتعب أكتر... إنما ممكن تستريح علي طووووول..

حوار..سؤال..بتاع..(1)

ده وقته ؟!

ليه لأ؟

مش عارف..

و هتعرف إزاي ؟

ممكن ينفع؟..

و ايه اللي يمنع ؟!

بلاش عقد و سيبها تمشي و شوف..

لسه بطير

شفتها من غير مناسبه. في يوم مش معروف من أيام العمل الرسميه. مدتلي اديها نزلت اشرب منها و هي بتضحك..

شربت رقه و جمال. بصتلي نظره شوق. و خوفي أقرب خلاني اشرب من بعيد .. كنت هطير بس عنيها قالتلي استني.. كلامنا لسه ماخلصش.. خادنا الوقت

و الكلام..و انا لسه بطير حواليها اشوفها احبها اكتر واكتر.. و هي كانت بتضحك و عنيها فيها دمعه فرح و شوق.و إديها لسه فيها كمان..و لسه بطير و بشرب رقه وحب

بنوته حلوه

ياتري لو اتجوزتك ممكن نجيب بنوته حلوه قوي كده؟..

ردت عليا و وشها بيتلون بدرجات الأحمر غير متوقعه السؤال.. ايه اللي انت بتقوله ده.. طبعا و دي محتاجه سؤال..

و نضحك و تضحك معانا الدنيا..و نكمل كلام..

بسرعه قبل الكلام مايغلي

مش عارفين نقولها.. مش عارفين نوصلها صح .. خايفين و مترددين.. مش عايزين الفرصه تضيع..

إعملوا زيها ولو خطكوا وحش..انجليزي عربي ,أوردي،فارسي بس نقولها..

يمكن مانعرفشي نقولها بعد كده تاني..

حاسس

اااه.. ايه الإحساس ده.. تكون متشال بين الحنان و الأمان بين الرقه و السلام..

و إدين الجمال و الحب..بين الصدق و الأمانه والتضحيه و الهدوء..

بين التفاهم والعقل والقلب والراحه.. حاسس بإيه؟

مجرد حلم

جالي في الحلم إمبارح بالليل.. لابس أبيض في أبيض. وراكب حصان أبيض و الدنيا بتمطر فل أبيض.. ماتفهمونيش غلط.. ده كان محمد صاحبي الله يرحمه في الحلم..

بصلي وقالي:.. كتير مننا هيرتاحوا.. و كتير كمان هيفضلوا تعبانين..

ضحكلي و مشي بحصانه..و ضحكت أنا كمان.!!