شاطي البحر

علي شاطئ بحر المتوسط.. في ليلة صافيه هادئة.. تمددت بجسدي علي الرمال الناعمة و نسيم البحر الهادئ يداعبني..خلعت حذائي بجانبي.. و سرحت في نجوم سماء ليلي الهادئ.. أغلقت عيني للحظات مع شهيق عميق يطهر رواسب يومي المزدحم داخل صدري..

إعتدلت من نومي لأعود الي يومي الممل لأجد...................... حذائي قد سرق.

الزحام

وسط الزحام فيه ركام للناس والمشاعر و الكلام.

فيه خنقه فيه خناقه فيه عطس وفيه زكام.

فيه محبين و ايدين ماسكه الإدين..

فيه بنت وولد ماشيين، وشهم فرحان مبسوط و عنيهم بتقول حب و غرام..

في وسط الزحام كتير كلام.

حب ايه

حب ايه و بتاع ايه؟ انتم شاطرين غير في كده.مافيش في دماغكوا حاجه غير الحب والبنات والولاد و قلة الأدب دي. خلاص مافيش حاجه تشغل تفكركوا وكلامكوا. الحياة خلصت من الحاجات المهمه الكبيرة صفصفت علي الحب. شباب آخر زمن..

طيب مالحب يا عمو في كل حاجه في حياتنا فعلا حتي لو اقتصرناه علي حب بنت أو ولد زي مابتقول.و بعدين عايزنا نفكر و نتكلم في ايه يشغل بالنا و مستقبلنا غير الحب عندك حاجه؟

يا سلام.. مافيش وطن عايزين تخلوه يقوم علي رجليه و تخلوه أحسن ، مافيش دين نفسك يرجع قوي زي الأول قضايا العيشه و اللي بيعشوها.

طيب ماهو كل ده يا عمو هيتعمل ازاي من غير الحب. لو مش بتحب دينك و بتغير عليه مش هتقدر تخليه يرجه قوي..و لو مش بتحب بلدك و بتخاف عليها مش هتعرف تغير حاجه فيها حتي لو السواد كان مالي الدنيا حواليك.حتي لو فقدت الأمل في التغير هتلاقي حلول حتي لو مع نفسكو القريبين منك.. لو مش هتحب شغلك و تخاف عليه مش هتقدر تثبت نفسك فيهو تقوم بالمطلوب منك و لو بتحب واحده و ربنا كتبهالك زوجه عايشين بتحبوا بعض هتذلل أي حاجه ممكن تفق في طريق حياتكم و تحب ولادك عشان تربيهم كويس و يحققوا اللي مش عارف تحققه في بلدك أو دينك.. هتلاقي الحب في كل حاجه حواليك.. واللا ايه يا عمو؟!!

لسه بتلعبي

هو انت لسه بتلعبي.. و اللا خلاص بقي عادي انك تمسكي لعبتك و الوقت يمر بيكي و انت مش حاسه ..

الدنيا تروح و تيجي و انت محبوسه في عقلك في مكانك في سريرك في حطانك في عرايسك

و ..عريسك.!!

في فستانك و مرايتك.. مبسوطه كده؟ خليكي كده..

أي كلمة منك أو منه

استنيت أي كلمة منك أو منه.. أي كلمه تحسسني إن ليا خاطر إن الحاجات اللي عملتها ليها قيمة. إن العملته ليكي وليه متقدر. كنت فاكر ان أخلاق الرجال لسه موجوده.. إن ظني بيه كان في محله. إن طيبتي طيبة مش سذاجه.إن الصدق والحب والصداقه مطلق مالوش حدود وألوان. خلتوني أندم علي شيء جميل.. آسف.

في المترو

يااااه.. أوووف..ايه ده؟ ماتوسع شوية مافيش دم؟..

مانتي ليكي عربيتين مابتروحيش تركبي فيهم ليه بدل مانت مزنوقه وسط الرجاله كده..

وهما يعني كتبوا علي العربيات الباقيه للرجال فقط..؟

لأ..

خلاص انت ايه اللي مزعلك؟

صحيح أنا ايه اللي مزعلي.. ياعيني علينا يارجاله..

سؤال.. حوار.. بتاع..(3)

نظرلي نظره بقرف وقالي:- عايز ايه؟ غير لقمه نظيفه، و هدمه كويسه، و عربيه بتمشي و فيها كاسيت ، وكمبيوتر فيه انترنت ، و صلة دش ، وأصحاب تخرج معاهم و تقضي وقت مش بطال..دانت تبقي طماع قوي.

قلتله: و هو ده كله و مابقاش طماع؟! يمكن..

بس ناقصني أحب واتحب.. والا الإنسان مابيملاش عينه غير التراب زي مابيقولوا..

قالي: و تفتكر لما تحب هيحبك زي مابتحبه..أو تتحب و تحبه زي مابيحبك.؟ هتلاقي حاجه ناقصاك.

هو لازم ملاقيش اللي نفسي فيه .. لازم تطلع حاجه ناقصه .. ماينفعشي الأثنين معا.. في لكشه واحده.؟!

سؤال..حوار..بتاع..(2)

ليه تتعب أكتر... إنما ممكن تستريح علي طووووول..

حوار..سؤال..بتاع..(1)

ده وقته ؟!

ليه لأ؟

مش عارف..

و هتعرف إزاي ؟

ممكن ينفع؟..

و ايه اللي يمنع ؟!

بلاش عقد و سيبها تمشي و شوف..

لسه بطير

شفتها من غير مناسبه. في يوم مش معروف من أيام العمل الرسميه. مدتلي اديها نزلت اشرب منها و هي بتضحك..

شربت رقه و جمال. بصتلي نظره شوق. و خوفي أقرب خلاني اشرب من بعيد .. كنت هطير بس عنيها قالتلي استني.. كلامنا لسه ماخلصش.. خادنا الوقت

و الكلام..و انا لسه بطير حواليها اشوفها احبها اكتر واكتر.. و هي كانت بتضحك و عنيها فيها دمعه فرح و شوق.و إديها لسه فيها كمان..و لسه بطير و بشرب رقه وحب

بنوته حلوه

ياتري لو اتجوزتك ممكن نجيب بنوته حلوه قوي كده؟..

ردت عليا و وشها بيتلون بدرجات الأحمر غير متوقعه السؤال.. ايه اللي انت بتقوله ده.. طبعا و دي محتاجه سؤال..

و نضحك و تضحك معانا الدنيا..و نكمل كلام..

بسرعه قبل الكلام مايغلي

مش عارفين نقولها.. مش عارفين نوصلها صح .. خايفين و مترددين.. مش عايزين الفرصه تضيع..

إعملوا زيها ولو خطكوا وحش..انجليزي عربي ,أوردي،فارسي بس نقولها..

يمكن مانعرفشي نقولها بعد كده تاني..

حاسس

اااه.. ايه الإحساس ده.. تكون متشال بين الحنان و الأمان بين الرقه و السلام..

و إدين الجمال و الحب..بين الصدق و الأمانه والتضحيه و الهدوء..

بين التفاهم والعقل والقلب والراحه.. حاسس بإيه؟

مجرد حلم

جالي في الحلم إمبارح بالليل.. لابس أبيض في أبيض. وراكب حصان أبيض و الدنيا بتمطر فل أبيض.. ماتفهمونيش غلط.. ده كان محمد صاحبي الله يرحمه في الحلم..

بصلي وقالي:.. كتير مننا هيرتاحوا.. و كتير كمان هيفضلوا تعبانين..

ضحكلي و مشي بحصانه..و ضحكت أنا كمان.!!

شخبطه 3

حلوه الحياه من يوم ماسكنتي أيامي..

حلوين الساعات من ساعة ماشفتك قدامي.

و عمري بوجودك عم يغلي صيرتي بعيني انت الأحلي

و صار دقة قلبي تغني و قلبي يغار من البسمه عشفافك،

من شعر النازل عكتافك،

من هالطله غني و طار..

مروان خوري

بخصوص ملكة جمال

بخصوص ملكة جمال الروح والخفه و العقل..كله يبعتلي الصور المعبره طبعا مش "صور شخصيه" بلاش صور شخصيه خالص.والتعليق عليها و شرح الأسلوب والدماغ..بنحب بنكره ايه.ايه بيدايقنا ايه بيخلينا مبسوطين.احنا رخمين والللا بنحب الهزار والضحك اصحابنا بيقولوا علينا ايه شايفين نفسنا لينا شخصيه في وسط شلتنا واللا عاديين.. عشان أجمعه و أنشر بطريقه كويسه بعد ماظبط ونبدأ التصفيات.. عرفوا الناس و ابعتولي علي الأميل ده: lockash@hotmail.comمع بياناتكم و طبعا ممكن اسامي مستعاره . اختاروا صح عشان ده اللي هنختار عليه من خلاله و لجنة التحكيم وميعاد وبداية المسابقه و هبلغكم طبعا.البنات بسعشان دي للبنات.. أما الولاد فادورهم جاي و هنعرف هيعملوا ايه.

أنا استنتكوا تخلصوا امتحانات..

شخبطه 2

شكرا لحبك.. فهو شمس و طاووس و نعناع و ماء..

و سحابه ورديه عبرت مصادفه بخط الإستواء..

سيرت معها رياح الحب معطرة بفل وياسامين الأحباب

1شخبطه

احببتك حتي زال الغبار من كل ارجاء البلاد.. ليسطع نورك يغطي سطوح العباد.. تظل آهاتي تنبعث في ارجاء الهواء واصلة لصومعتك تؤرق نومك حتي تدركي حبي كلما تعاليت

علمت أنك تدركين لمشاعري و لكن تنكري تعاطفك و ازدهار الحب داخل ارجاء قلبك الزهيد

قطرة دمع سوداء

قطرة دمع سوداء.. تنزف أوجاع و غباء.. علي سطح الخد المتورم من جرح الأحباب..تلهبه قطرة دمع سوداء.. سوداء من تقيح الأخلاق، من بعثرة الأفكار، من فساد العقول والأحقاد.. من غدر حبيب في الليل في ظلمات الأنوار، زادها حسن الظن بمحبوب تحول الي وحش القصص المرعبه، الي غبي غادر سخيف الطباع. أنزلت قطرة دمع سوداء..قاومتها، بل حبستها داخل جفوني أيام و شهور، لكن دفعتها الذكري، دفعتها الريح الباردة من شتاء الزمن الغابر.. زمن المشاعر البريئه والعقول المليئة بالحب و الإنسانية.. فنزلت قطرة دمع سوداء.. سأتركها لتجف مع الزمن والأجواء.. لتذهب دون رجعة.. ليشفي خدي المتورم من جرح الأحباب.. لتري عيني الدنيا ..

دون قطرة الدمع السوداء..

ملكة جمال

في تجمع من التجمعات بين الأصحاب و الأحباب.. و الكلام بيجيب كلام.. و الحكاوي تكتر بينا.. بلاقي إن كل البنات حلوين..ماتتغروش قوي كده.. مش حلاوة الشكل بس.. بس كلامي و مناقشاتي و معرفتي بالناس.. المحدوده نوعا ما بالنسبه لسني و خبرتي الحياتية.. بس بسأل نفسي ليه مافيش مسابقة ملكة جمال الروح.. ملكة جمال خفة الدم.. ملكة جمال العقل والتفكير و الروح الحلوه..يمكن عشان البنات مخها في المكياج و اللبس و مش فاضيين يفكروا..موجود..؟!يمكن عشان مخ الشباب في جمال الشكل و الجسم بس و مش بيبصوا علي الجوهر كتير..موجود..؟!يمكن عشان خفة الدم و الروح الحلوة شحت في السوق اليومين دول..موجود..؟!ماظنش اننا بالتفاهه دي ولا بالتفكير ده زي مالكبار بيقولوا علينا.. أو علي الأقل اللي أعرفهم مش كده.. بنات و ولاد..والله إحنا كويسين و حلوين و بنفكر و بنحترم بعض و بنعيش و بنحارب و كتير حاجات.. حلوين من جوة و من بره..بس مشروع ملكة جمال الروح و خفة الدم دي لازم نفعّلها بطريقة ما.. علي الأقل بينا و بين بعض كمجموعات اصحاب أو أقارب..