ايوه كده

مين ده ؟؟! ده أنا.. أيوه انا.. لما تعرف ان الدنيا مش ماشيه كده.أيوه كده غريبه كده .. لما تلاقي الناس مستغرباك . في تصرفاتك في كلامك في حياتك.غريبه مش كده..أيوه كده.تشوف في مرايتك شخص غبي واحد مصدوم واحد محتار،مخنوق،مشغول بناس والناس مش مهتمين.تفتكر انه مجنون و غبي يشفوه ناس تانيين.تسأل نفسك علي عمايلك تلاقيها صح تشوف الناس مقسومين.حبه يشيلوا الهم و يساعدوا ، يشتموا و يسبوا حبه تانيين.تحتاج وقفه تحتاج حنيه تحتاج مصالحه. تلاقي بعاد من قريبين.تبص قدامك سواد و فوقك أمل و حياه.. تحتك غباوه وحقد و وراك حزن و دمعه و فكره. تستني الخطوه ماتجيش كده زي مانت تعوزها كده.ايوه كده غريبه كده.

س:ج

س: بتحبني بجد؟

ج: أكيد بحبك.

س: يعني أنا أول حب في حياتك؟

ج: أول حب متبادل باحترام و تقدير و اخلاص.

س: يعني حبيت قبلي؟

ج: وانكر ليه، حبيت.. بس عكس اللي قلته..إنت أول حب يستاهل أكمل بيه الحياة..

س: لسه فاكر الحب القديم؟

ج: فاكره زي حاجات كتير ماتتنسيش.

س: ندمان عليه؟

ج: ندمان علي عمري و وقتي و مشاعري و فلوسي اللي ضيعتهم من غير فايده.

س: مبسوط معايا؟

ج: أكتر مما تتخيلي.

س: هل لديك أقوال أخري؟

ج: عايز أقول اني بحبك قوي.