كلام جميل كلام معقول 1

كلام جميل كلام معقول :" إمبارح بالليل.. وانا سهران الليل كنت بكلم صورتك و حدي و جايب سيرتك وايا نجوم الليل..
ايه يعني لو هضيع بعدك يومين ايه يعني لو هدمع بعدك دمعتين ..

اجرحني دلوقتي بلاش بعدين.. انا كنت باقي عليك و خلتني أخسرك..

انا مش هقول بعدت ليه و ايه غيرك..و البعد لو كان صعب بكره استسهله..

لطشة برد

لطشة بردأكيد بتحس انك مش مظبوط. حاسس إنك مصدع و ملخبط.أكيد لطشة برد..بطنك وجعاك و مالكشي نفس للأكل ماتفكرش في حاجه تانية .. هي صدقني لطشة برد..عايز تبعد وتنام.. مزاجك وحش..أكيد "مش احتمال" لطشة برد..حبيبتك سابتك كالعاده و متعذب و بتفكر كتيييررر.. صدقني بتكدب علي نفسك.هي مش أكتر من لطشة برد..تعبان من الشغل واللي فيه. أوهام يابني هتلاقيها لطشة برد..المهم انك لازم تقوم من لطشة البرد بنت اللذين..لازم تخف من لطشة البرد..

أول عباس

مكرم عبيد يا شباب؟ آه إركب..سلامو عليكم.. محدش رد غير واحده زي القمر .. وشها يفتح النفس للكلام..و عليكم السلام ورحمة الله..و عشان هي بنت حلال الدنيا اتقفلت في وشي و الميكروباص اتملي مافيش غير مكان جمبها.. في حد جمبك؟ لا اتفضل..الناس مقمات يا جماعه.. كنت نازل أول عباس.."عباس العقاد" وطلعت هي كمان. ممكن تقوله أول عباس.. حاضر مانا نازل معاكي. لسه شويه.. مش فيه عربيات بتدخلني جوه عباس.. قولتلهاعباس كله عربيات بتدخل جواه.. هتلاقي كتير. انت راحه جوه عباس قوي واللا في الأول؟لا شوية بس اصل رجلي توجعني و مش قادرة اتمشي في الحر ده. الجو وحش النهارده. هزيت دماغي ببلاهه آه الجو فظيع.اللي نازل أول عباس.. ايوه يا باشا..نزلت و هي ورايا.و من حظي الجميل انها كانت هتقع و سندت علي إيدي.. ميرسي.. خلي بالك.. بصي اركبي من هنا و هو هينزلك في الحته اللي انت عايزاها.. ميرسي قوي.. باي.مشيت و انا باصص عليها.. أكيد الصدف الحلوة اللي بتقابل الواحد دي بتعمل حاجات أحلي للواحد كمان. بس هو عباس دايما بيهدينا كل فترة كده بحاجه حلوة تفتح النفس للإستمرار في يومنا الغريب.. ميرسي عباس..

واحشني قوي

زي النهارده من 7 سنين عرفته.. زي مايكون امبارح.. شايفه قدامي أهو بيلعب معانا فيفا كورة علي الكمبيوتر في الدورة اللي بينعملها مع بعض .. كان دايما بيغلبني.أهو داخل في ايده طبق الحلويات المشكل بتاع كل عزومة رمضان كعادته. بيصلي معانا المغرب قبل مانروح نتفرج علي الماتش في الكافيتريا بتاعتنا..فاكره و أنا برغي معاه بالساعات قبل ماننام في اسكندريه في الصيف لحد الفجر..بنشرب نسكافيه علي النيل في النادي في عز الشتا و بيحكيلي علي البنت اللي حبها..و حلمه ماكملش..الله يرحمك يا " محــمد".. واحشني قوي..

مقابلة

قابلتها بعد فترة غياب.. لمست اديها بسلام..

كان في عيني كلام.. و عنيها كمان..

بس سكوتنا بإبتسامه قلت و قالت كتير كلام..

غباوه

عجبني كلام لواحد فنان علي الأقل بالنسبالي .. كتبه في طفاية و دي تصغيرتقتوقه بالدلع .. كان بيتكلم علي الغباء و الأغبيا.. بصراحه هوموضوع مهم بالنسبه الي لأنهم كتروا قوي..

ايوه .. الأغبياء او البيعملوا نفسهم أغبيا.. كتروا في الكون.. كتروا في الحياه.. و ابتدينا نعاني منهم في حياتنا من زماااااان...

بس اللي محيرني .. ليه هوما اغبيا؟؟ أو ليه هما بيعملوا نفسهم أغبيا؟؟!!

و ليه دايما هما اللي بيعترضوا طريق البحث عن سبب الهم و الغم في حياتنا.. بنلاقي انهم ليهم اليد الطولي فيه..!! والقصيرة كمان..

يوم الحب

هتقولولي عندنا عيدين بس الصغير والكبير هقولكم لما نسعد يتيم في يوم نفضي فيه من روتين الحياة والشغل و نحاول نسعده يبقي يوم اليتيم. و لما في يوم نفتكر أمنا اللي عمرنا ماننساها بس عشان مشاغل الدنيا و الناس ، نهديها هدية و لو بسيطه نفرحها يكون يوم الأم.. و اليومين دول يوم الحب. اصله عملوه مرتين في السنه من قلة الحب اللي بين الناس.. و عشان يوم الحب.. بقول لكل اللي بحبهم : بحبكم من غير عوزة من غير مناسبة من غير مصلحه.. واللي بيحبوني بحمد ربنا علي النعمة حب الناس .. و يا رب يزيدوا كمان و كمان.. و اللي مش بيحبوني بقولهم: طظ فيكوا .. و طظ و نص.. و البنت اللي نفسي أحبها مستنيكي تيجي في أي وقت بس تيجي..و البنت اللي كنت بحبها.. مش هنساكي و مكانك في عقلي وقلبي موجودين. بس الخير يبقي دايما بدل الحاجات الوحشه. و طبعا طول مابنحب ربنا ربنا هيحبب فينا خلقه.. و كل يوم حب وانتم محبوبين..