قفلت شباكي عليا شويه.. مش عايز ساقعه ولا حر..
عايز الدنيا أحلي من غير ماشم روايح شر..
من غير تراب المدينه من غير غبار الأموات العايشين حواليا ..مش عايز داوشه تاني مش عايز صريخ. مش عايز واحده تقرفني بعمها اللي مايتسمي.. عم غباء.. مش عايزخناق شبعت خناق.
مش عايز ناس تلومني علي حاجات عملتها و حاجات معملتهاش.. شبعت من التلوث شبعت نكد.. شبعت من الشوارع و الشبوره اللي ملت هوانا من جوه و من بره ..هقفل شباكي و أدور علي منور..علي حمام علي صاله يكون شباكها بيطل علي حاجه غير.. علي شارع غير.. علي بشر غير و هوا غير.. و افتحه علي الآآآآخر..
15 comments:
لو عايز تلاقي الدنيا دى ومتبقاش لوحدك في نفس الوقت ولا حد يلومك ولا يضايقك روح لحد معملش ذنب في حياته روح العب مع طفل صغير نونو حلو وامر وبيضحك وبص له وقوله يابختك مش شايل بقلبك هم ولا مشكلة معندكش شئ يشغلك ولا يطير النوم من عينيك صح ولا ايه ؟
عاشقة ضوء القمر
عندك حق ياضي
اااااااه يا لوكاش
كلامك حلو وبيفتح جوايا كتييير
بيقلب اوجاع
يفكرني بكلام بقوله لنفسي عن اني نفسي ونفسي
كلامك جميل
كل ده و كويس اننا لسه عايشين.لسه فينا الروح.لسه بنعافر.بجد كلامك دخل في الخياشيم يا أحمد شبعت بجد من الحاجات الكتير اللي قلت عليها بس هو لو دورنا هنلاقي مكان تاني؟؟بيتهيقلي صعبه قوي.تاني الله علي كلامك ..
ايه الكلام الجامد ده بس بالراحه علينا يا عم
بس تصدق هو قريب شويه من فكره انك تقعد مع نفسك بعيد عن كل الناس دى
وبرضه الاطفال يا عاشقه.............حاجه متتوصفش تنسى بيها الدنيا بجد
بس اللى احلى من كل ده
واللى يحقق كل المزايا
يخليك عايش وسط الناس
ويخليك تقعد مع نفسك ويبعدك عن كل المشاكل دى
كل ده و
فى وقت واحد
الحبيب انك تكون بتحب
عايش مع حبيبك
واجمل واعظم حب بجد لو جربناه
حب الودود
اللى فعلا هيغنيك عن كل ده
سووليد
اصبت ياسوليد
حب الودود
سوري يا جماعه علي عيني التاخير بس موسم بقي مزاكرة و امتحانات ربنا يعديها علي خير,دنيتنا بقت كده فعلا.كلها من الأشياء اللي زهقتنا اللي قال عليها لوكش.و الحل في مكان تاني؟ هو ده الحل.؟ واللا اننا نحاول نغير الدنيا دي لأني بصراحه شايفه ان المكان التاني اللي هندور عليه ده مش موجود.
عم الغباء
.........
اكيد هو حاجة او حد في حياتنا مضايقنا كلنا مش كده؟؟
حاجة بتحصلنا او حد مش طايقينه
فعل بيصدر مننا او من ناس تانية حوالينا
حاجة بتخنقنا وخلاص
صح ولا ايه؟
أكيد يا دندن.ماتنسيش ان أحمد لوكش هو اللي عرفنا بيه او نبهنا.مش مجرد انه خانقنا او مدايقنا.ده بيقف في طريقنا و بيعطلنا و مابيخليناش ناخد بالنا من حاجات تهمنا.بيبوظ دنيتنا لو سبناه يعمل فيها قريبنا عم غباء. مصيبه الراجل ده حد يشوفله حته تشيله مننا نفسنا دنيتنا تمشي شويه حلو.
ملحوظة للوكش و ليكوا طبعا. اليومين اللي فاتوا فيه كسل فيه تراخي فيه ناس ماجتشي هنا من فتره وانا واحده منهم بلخبط في مواعيدي كتير احنا في موسم مزاكرة وامتحانات و الكل مشغول او المفروض يكون مشغول..فبقترح يعني ان المواضيع تطول مدتها يعني موضوع كل اسبوع ياخد وقت اللي مالحقوش النهارده يشوفه بكره بعد 3 ،4.و في نفس الوقت الناس ماتتلخمشي في التعليقات و تخش فحوارات.ويفضل برده انتاجنا شغال و مستمر.يعني آية مدحت مثلا بقالها اكتر من 3 او 4 مواضيع ماسبتشي تعليق و نادر و أنا يمكن كمان مش متابعه قوي. و الناس دي عرفت أو قالو انهم مشغولين فعلا في المزاكرة والامتحانات فحرام نحرم نفسينا منهم و منا فكروا وقولولي.
مش ملاحظين ان اكتر التعليقات انا ويويو
وصاحب الموضوع مالهوش تعليق
!!!!!!!!!!!!!!!!!!!!!!
؟؟؟؟؟؟؟؟؟؟؟؟؟؟؟؟؟؟؟؟؟؟
رأيي يا دندن.. انا قلته في الموضوع نفسه.بجد نفسي الاقي حل لكل ده..الاقي حل لحاجه تبوظ من الناحية التانيه.اظبط حته ..حته تانيه تضرب.. عايزها تمشي ولو خمس دقايق زي مانا عايز.كل كلمه في الموضوع ده بجد طالعه من الخياشيم..
و النسبة لرأي يويو بخصوص وقت مزاكرة وامتحانات انا موافق بعد اذن الناس يعني عندي و "جميله" كمان..وحسكوا بالدنيا كده يا رب..
ياريت فعلا نقدر نغير حياتنا ونسيب كل حاجة بتضايقنا وتتعبنا
ولو كان الحل فى شباك يتقفل وتانى يتفتح كانت الدنيا بقت أحلى بي نجيب الشباك ده منين
ياريت كانت التغيير بايدنا
ياريت
تحياتى
رأيي بقي ان الايجابية في النظر للأمور بتخلي احساسنا بالحياة احسن من النظر ليها بسلبية لأن علي الاقل لو الايجابية مش هتوصلنا للسعادة علي الاقل هنوصل لحالة التعادل مش الاكتئاب نحاول و نحاول و كمان نتفاعل و مرة في مرة ان شاء الله الدنيا هتبقي احلي و مفيش حاجة بتثبت علي حالها يوم حلو ويوم وحش و يوم نص نص عشان نحس بجمال اللحظات الجميلة
صدقني أسوأ شئ في الدنيا الوحدة
دور وان شاء الله أكيد هتلاقي السعادة و هتلاقي اللي يفهمك
شباك المنور محجوز .. من فضلك دور علي اي شبابيك تانيه
Post a Comment